Logo Antigaspi

Antigaspi
  • fr
  • en
  • pt
  • lu

    • Antigaspi Ëmfro

    Liewensmëttelverschwendung: Lëtzebuerg ass sech dem Problem bewosst, et bleift awer nach villes ze verbesseren

    Fir den internationalen Dag vun der Sensibiliséierung fir Liewensmëttelverloschter a Liewensmëttelverschwendung (IDAFLW), den 29. September, huet de Ministère fir Landwirtschaft, Wäibau a ländlech Entwécklung eng Ëmfro iwwer d’Liewensmëttelverschwendung an d’Verhale vun de Lëtzebuerger Stéit an Optrag ginn.

    D’Zil vun dëser Etüd ass et, besser ze verstoen, wéi eng Facteure bei der Liewensmëttelverschwendung an de Stéit matspillen.

    D’Etüd am Iwwerbléck

    • 91 % vun de Stéit geheie méi oder manner reegelméisseg Liewensmëttel ewech.
    • 26 % vun de Participante geheien op d’mannst eng Zort vu Produiten op d’mannst eemol d’Woch ewech.
    • 60 % vun de Stéit sinn der Meenung, datt sech d’Liewensmëttelverschwendung zanter dem Ufank vun der Covid-19-Kris net entwéckelt huet, weeder am positiven nach am negative Sënn.
    • 75 % vun de Befrote kennen déi richteg Definitioun vum Verbrauchsdatum (date limite de consommation – DLC) net.
    • 84 % vun de befrote Stéit sinn der Meenung, datt eng méi breet Sensibiliséierung vun der Bevëlkerung als Hiewel muss agesat ginn, fir d’Liewensmëttelverschwendung ze reduzéieren.

    D’Interpretatioun vun dëser Etüd ass e bësse widderspréchlech: Déi befrote Stéit si sech dem Problem vun der Liewensmëttelverschwendung bewosst an hu gutt Absichten, an awer bleift d’Liewensmëttelverschwendung zu Lëtzebuerg ganz héich (der Etüd „Génération, traitement et prévention des déchets alimentaires 2018/2019” vun der Ëmweltverwaltung no gi 75 % vun de Liewensmëtteloffäll vun de Stéit, 10 % dovun vun de Grousskichen, 8 % dovun vun der Restauratioun a 7 % dovun vum Handel verursaacht).

    Et ass och interessant, drop hinzeweisen, datt d’Liewensmëttelverschwendung méi grouss ass a Stéit mat Kanner, wat haaptsächlech op de Mangel un Zäit, fir Molzechten am Viraus ze plangen, zeréckzeféieren ass, mee och dorop, datt bei de Kanner d’Aen dacks méi grouss sinn ewéi de Bauch.

    Et soll ënnerstrach ginn, datt dës erschreckend héich Liewensmëttelverschwendung, déi am Widdersproch zu de gudden Absichte vun de Stéit steet, net op e virsätzlecht Verhale vun de Stéit zeréckzeféieren ass. Et handelt sech villméi ëm Gesten, déi op enger lückenhafter Informatioun iwwer den Transport vu frësche Wueren aus dem Supermarché heem, d’Interpretatioun vun de Verbrauchsdatumer, de richtege Stockage vun de Liewensmëttel an d’Iwwerschätze vum reelle Besoin am Fall vu Promotioune baséieren.

    Ënnert der Rubrik „Wat kann ee maachen” fannt Dir einfach Gesten, déi et jidderengem erlaben, d’Quantitéit u Liewensmëttel, déi ewechgeheit ginn, substanziell a séier ze reduzéieren.

    Déi komplett Resultater vun der Ëmfro