Erausfuerderungen

Zesumme géint
d'Liewensmëttelverschwendung

1/3 vun alle Liewensmëttel déi weltwäit produzéiert ginn, ginn ewechgehäit! 
Gläichzäiteg awer leide bal 1 Milliard Mënschen op der Welt nach ëmmer Honger. Mat dëse Fakte virun Aa schéngt et evident, datt mer mussen handelen.
Nieft der moralescher Verflichtung sech dem Problem unzehuelen, dierf een och déi ekologesch Dimensioun net vergiessen!

Liewensmëttelverschwendung bedeit, datt knapps 1/3 vun allen Notzflächen onnëtz bewirtschaft ginn, ouni déi enorm Quantitéiten u Waasser ze vergiessen, déi verbëtzt ginn. Fir sech dat emol bildlech virzestellen: dat sinn 250 Kubikkilometer pro Joer, also 3-mol de Genfer Séi.

A punkto CO2-Emissioune gesäit et och net besser aus: 3,3 Gigatonnen, dat sinn 80% vum CO2-Ausstouss pro Joer a China!
Dës Zuelen, déi d’FAO publizéiert huet, kann een net einfach ignoréieren. Zemol wann ee weess, datt d’Populatioun konstant wiisst a mer bis 2050 d‘Grenz vun den 9 Milliarde wäerten erreechen. D‘Erausfuerderung ass fir ze kucken, wéi mer jidderee kënnen ernieren a gläichzäiteg eis natierlech Ressourcë schounen, fir déi zukünfteg Generatiounen net weider ze belaaschten.

Wou gi Liewensmëttel verschwent?

Haushalt
42%  
ginn an den Haushälter verbëtzt well oft ze vill kaaft gëtt, schlecht gelagert gëtt, d'Datum Indikatioune falsch interpretéiert ginn an d'Reschter net verwäert ginn.
Verarbeschtung
39%  
ginn an der Produktioun verluer duerch Iwwerproduktioun, 
beschiedegt oder deforméiert 
Produkter an onverwäerten Nieweprodukter.
Restaurant
14%  
ginn an der Restauratioun verluer wéinst ze grousse Portiounen (oft keen Choix bei der Gréisst) a well d'Cliente Reschter net mat heem huelen.
Liewensmëttel Geschäft
5%  
ginn am Handel verluer wéinst ästhetesche Standarden, Verpackungsfeeler an duerch ze grousse Lagerbestand.
Nieft der finanzieller an ekologescher Dimensioun, huet all Eenzelen och eng ethesch Verflichtung sech dem Problem vun der Liewensmëttelverschwendung unzehuelen. D‘Erausfuerderung ass fir ze kucken, wéi mer jidderee kënnen ernieren a gläichzäiteg eis natierlech Ressourcë schounen, fir déi zukünfteg Generatiounen net weider ze belaaschten.
Mir als Ministère fir Landwirtschaft, Wäibau a ländlech Entwécklung hunn dofir decidéiert, fir de Welthongerdag, de 
16. Oktober 2016 an de Kontext vun der Liewensmëttelverschwendung ze setzen. Dat war souzesoen de Startschoss vun onser breeder Sensibiliséierungscampagne 
« Zesumme géint d'Liewensmëttelverschwendung »
Sourcen:

Gëlle Regelen

linkedin facebook pinterest youtube rss twitter instagram facebook-blank rss-blank linkedin-blank pinterest youtube twitter instagram