Dës Broschür gëtt praktesch Tuyauen wéi ee manner Liewensmëttel ka verschwenden: dat geet beim Akafen un, iwwert d’Araumen vum Frigo bis hin zum Verwäerten vun eise Reschter. Et fënnt een awer och wichteg Rotschléi dran z.B. fir déi ënnerschiddlech Datumen op de Verpackungen besser ausernee ze halen.

All Gemeng déi sech dem Solidaritéitspakt ugeschloss huet kritt d’Wanderausstellung Antigaspi vum Landwirtschaftsministère gratis geléint, geliwwert an opgeriicht. D’Wanderausstellung riicht sech haaptsächlech u Grondschoulschüler vum 3. a 4. Cycle a mécht d’Kanner an d’Léierpersonal op eng spilleresch an interaktiv Aart a Weis op de Problem opmierksam. Donieft ass d’Ausstellung awer och op groussen Eventer ze gesinn fir méi e breede Publikum ze erreechen a gëtt oft mat flotte Workshoppen animéiert.

De Lycée technique hôtelier Alexis Heck, de Lycée technique de Bonnevoie an de Lycée technique agricole sinn dem nationale Solidaritéitspakt géint Liewensmëttelverschwendung bäigetrueden an thematiséieren d’Problematik queesch duerch hier Fächer. Hei ginn déi Professionell vu muer ausgebilt.