){kind=logo}
D’Reduktioun vun der Liewensmëttelverschwendung ass eng Prioritéit vun der Lëtzebuerger Ernärungspolitik a fest am Nationalen Aktiounsplang fir e nohaltegen Ernärungssystem 2026–2030 (PAN-Alimentation) verankert. Liewensmëttelverloschter an -offäll betreffen déi ganz Wäertschöpfungsketten an hu bedeitend ekologesch, wirtschaftlech a sozial Auswierkungen.
PAN-Alimentation
De PAN-Alimentation verfollegt en ëmfaassenden Usaz an enthält Moossnamen iwwer déi ganz Liewensmëttelketten ewech – vun der landwirtschaftlecher Produktioun iwwer d’Veraarbechtung, d’Verdeelung an de Catering bis zum Konsum. D’Zil ass et, déi strukturell Ursaache vun der Liewensmëttelverschwendung ze identifizéieren, besteeënd Praktiken ze verbesseren an d’Bewosstsinn bei allen Akteuren fir e verantwortungsbewossten Ëmgang mat Liewensmëttel ze stäerken.
Besonnesch Opmierksamkeet gëtt der Präventioun, der ëffentlecher Sensibiliséierung an der Fërderung vu gudde Praktiken geschenkt. Informatiouns- a Sensibiliséierungsinitiativen hunn als Zil, d’Konsumenten ze ënnerstëtzen fir d’Liewensmëttelwäertschätzung ze stäerken an d’Verschwendung am Alldag ze reduzéieren. Zousätzlech konzentréiert sech de PAN-Alimentation drop, d’Offer u Formatiounen weider ze entwécklen an Ernärungskompetenzen op verschiddene Niveauen ze stäerken, dëst fir d’Evolutioun vun de Praktiken an der ganzer Liewensmëttelketten nohalteg ze ënnerstëtzen.
Op europäeschem Niveau setzt d’Richtlinn (EU) 2025/1892 och verbindlech Ziler fir d’Reduktioun vum Liewensmëtteloffall, nämlech:
- 10 % Reduktioun vun der Quantitéit u Liewensmëtteloffäll, déi an de Secteure vun der Veraarbechtung a vun der Fabrikatioun produzéiert ginn;
- 30 % Reduktioun pro Kapp vun der Quantitéit u Liewensmëtteloffäll, déi kollektiv am Eenzelhandel an an anere Forme vun der Liewensmëtteldistributioun, an de Restauranten a Cateringservicer souwéi an de Stéit produzéiert ginn.