D’Uebst schmaacht am beschten, wann een et selwer gepléckt huet. Mee dat däerf ee just a sengem eegene Bongert. All Joer verfaulen awer kiloweis Äppel, Bieren, Quetschen etc. op an ënnert de Beem an de Wisen a laanscht d’Landstroossen. Dat si verbëtzte Liewensmëttel. Doraus kéint een och Viz pressen, Gebeess oder Kompott kachen, domat baken a nach villes méi.

Mat der Aktioun „Gielt Band“, déi am Kader vum Internationalen Antigaspi-Dag, dem 29. September 2021, organiséiert gëtt, rifft de Landwirtschaftsministère, zesumme mam Syvicol, d’Biergerinnen an d’Bierger dozou op, sech op eng flott a nohalteg Manéier géint d’Liewensmëttelverschwendung ze engagéieren.

D’Gemengen déi bei der Aktioun matmaachen, markéieren déi entspriechend Uebstbeem mat engem giele Band. Jiddereen dee well däerf da gratis, fir den eegene Gebrauch, Uebst vun deene Beem plécken an dat wat ënnendrënner leit rafen.

Wann Dir als Privatpersoun oder Associatioun eng Iddi fir een Antigaspi-Projet huet, da maacht mat bei eisem Opruff fir Projeten. D’Gewënner kréie vum Ministère fir Landwirtschaft, Wäibau a ländlech Entwécklung eng finanziell Ënnerstetzung fir hier Aktioun.

Weider Informatiounen: